هو وهي
أى بنت مقبلة ع الجواز..ركزى معايا
فى أى قاعدة بنات بينهن واحدة مقبلة على الزواج لازم تكون عاملة زى الحصالة اللى تتكبس بدل الفلوس معلومات ونصايح أشى اشربي ميه كتير عشان بشرتك و أشى روحى المحل الفلانى عشان الصينى والكوافير العلانى عشان شعرك , أنا بقى –وعن تجربة- عندى نصايح من نوع خاص شوية ودايما البنات بتغفل عنها ألا وهى الرياضة ,البنت من دول تهتم بالفستان و الموبيليا وخلافه وتنسى صحتها فالرياضة مهمة جدا فى الفترة دى بالذات .
أنا عايزة كل بنت داخلة على حياتها الجديدة تركز معايا شوية لأن الدنيا الجديدة دى لازم تجهزى نفسك لها وتمارسى الرياضة اللى هتساعدك كتير فى الايام الجاية ;
اول حاجه الملاكمة علشان تعرفى تردى على تهريج البوابين اللى بيبقى فى الأول وبعد كده الرياضة دى هتساعدك كتير كنوع من الدفاع عن النفس , نيجى لرياضة الجمباز ودى مهمة جدا خصوصا فى الأعمال الشاقة المؤبدة اللى هتتعرضى لها وهى من نوعية أزاى تقفى عل أطراف صوابعك علشان تطولى اى حاجه بعيدة
أو تنضفى نجفة وانتى سانده رجل على كرسى والتانية فى الهوا , أما بقى رياضة الجرى هتنفعك لما يكون فى أولاد إن شاء الله ولا يمكن أن ننسى قفز الحواجز علشان تعرفى تقفزى فوق اللعب والحاجات الكتير المرمية على الأرض.
وأوعى تنسى الباليه هينفعك لما تلاقي نفسك مكسلة تقومي تعملي اي حاجة في البيت ومكسلة حتي تكلمي البنت اللي بتيجي تساعدك لأنها هتفضل لوك لوك علي دماغك وفي الأخر هتنزل وتسيبك مصدعة; وساعتها يفضل انك تتعلمى مهارة تخطي الحواجز الترابية علي أطراف الأصابع وتريحى دماغك , لكن رياضة
الكنغ فو أهمهم علشان لو جوزك فكر يبلطج فى يوم من الأيام تعرفى تجيبى حققك بدل ما تحتاجى لمساعدات خارجية من الأهل والأقارب , أما رياضه النيشان مهمة أيضا علشان لو قل عقله واتجوز عليكى , أخيرا وليس آخرا رياضة اليوجا ودى علشان تقدرى تتنحى وتبقى هاديه وتكتسبى صفة اللامبالاة بعد الكم الرهيب من الاستفزاز اللى هتشوفيه وكمان يبقى عندك القدرة على التفكير بعمق “هتخلصى منه ازاى” .
